Ысык- Көл облусунун Түп районуна караштуу Тасма айылында Асан Сопиев орто мектебинде «Алиппем алтын ачкычым» аттуу майрам болуп өттү. Былтыр карантин болуп, онлайн өтүлгөн. Быйыл окуучулар Алиппе менен кош айтышып, концерттик программа тартуулашты.

Окуучулардын жылы бою күткөн ой тилеги орундалганын айтат Асан Сопиев мектебинин 1-классынын класс жетекчиси Элзат Эсенгелдиева:
«Биз мурунку жылдарда майрамды апрель айынын соңунда өткөрчүбүз. Былтыр онлайн түрүндө өтүлгөн. Быйыл салтанаттуу түрдө, кызыктуу программалар менен коштолуп өттү. Сахнада элдин алдында Алиппе майрамды өткөрүп алганыбызга абдан кубанычтамын. Китептерден, интернет булактарынан, журналдардан көп окуйм. Кыргыз тилчи мугалимдер менен байланышып, алардан жардам сурап даярдандык. Изденүүлөр көп болду. Балдар сахна алдыда өзүлөрүнүн өнөрлөрүн тартуулашты. Сахна менен класстын ичинен даярданган такыр башка экен.

Балдарыбыз кичинекей болушса да көңүлдөрүбүздү көтөрүштү дейт айыл тургуну Анаркүл Эсенбаева:
«Алиппе майрам» бул балдардын көптөн күткөн эң жакшы майрамы. Балдарыбыз күндө эле 1-класс боло бербейт да. Балдар ойноп күлүп, концерттик программа уюштуруп кубанышат. 1-классты бүтүрүп жатып тамгаларды үйрөнүп, санаганды билип калышат. Алиппе китеби менен коштошушуп бир тепкичке көтөрүлүү алар үчүн абдан кызыктуу болот. Менин уулум дагы китеби менен коштошуп, жаттаган ырларын окуган жомокторун аткарып беришти»,- дейт билдирүүсүндө.



Даярдаган: Айназик Кубатбекова, Аяна Жайлобаева.