Кыргыз республикасынын Президенти Садыр Жапаров Ысык-көлгө болгон иш сапарында Түп районунун Кең Суу айылындагы мечиттин ачылышына катышты.

«Мусталый уулу Нургожо Ажы» атындагы 1500 орундуу жаңы мечит эскисинин ордуна «Ассанабил»эл аралык кайрымдуулук фондунун каражаттарынын эсебинен курулган.

Азыркы учурда анын айланасын көрктөндүрүү иштери аяктап калды.
Мамлекет башчысы өз сөзүндө Кыргызстандын калкынын басымдуу бөлүгү Ислам динин карманаарын жана кыргыздардын жүрөгүндө Жаратканга ишеними бекем экенин белгиледи.Садыр Жапаров жаңы мечит коомдо тынчтыкты жана ынтымакты бекемдөөгө себепкер болот деген ишенимин билдирип,жаштарды руханий адептүүлүккө, ислам дининин чыныгы баалуулуктарына умтулууга чакырды.

Президент жаңы ачылган объект ыймандуулукка,мекенчил болууга ,Ата Мекенине,эл-журтуна камкор мамиле кылууга чакырган борбор болоруна бекем ишенет.Мамлекет башчысы заманбап мечиттин курулушун колдоп, ибадат кылууга жана динди окуп үйрөнүүгө бардык зарыл шарттарды түзгөн Саид Баюми жетектеген кайрымдуулук фондуна жеке өзүнүн атынан жана айыл элинин атынан ыраазычылык билдирди.

Соңунда Президент Садыр Жапаров кыргыз элинин бакубатчылыгы жана өлкөнүн өнүгүшү үчүн дуба кылды.


Айназик Кубатбекова.